HƏQİQƏT
Adam İnsan olmasa – Azad olmaz.
Adam Azadlığı – əslində Əsarətdir.
7 Dözüm günü, Çiçək Ayı, 15-ci il. Bakı.
YAŞAYIŞ
Cəmiyyətdə Ağalıq eləyə bilmir – Ailədə Ağalıq eləyir.
Cəmiyyətdə Xanımlıq eləyə bilmir – Ailədə Xanımlıq eləyir.
Ağalığı yaşadır.
Xanımlığı yaşadır.
ƏLAQƏ
Varlı Yoxsulun Hesabına Varlı olur.
Yoxsul Varlının Hesabına Kasıb olur.
Varlı Yoxsulluq yaradır əslində.
Yoxsulluğu Var yaradır əslində.
ƏLLƏR
Yoxsulluğu yaradan Varlı Yoxsula əl uzadır.
Varlılığı yaradan Yoxsul Varlıya əl açır.
HƏQİQƏT
Varlı Ölkə olmur.
Varlı Dövlət olur, Varlı Təbəqə olur.
Yoxsullar olmasa – Varlılar olmaz.
FƏRQ
Din – Yalançılıq.
İnam – Həqiqətçilik.
HƏQİQƏT
Dini yaşadan – İnamsızlıqdır.
Allahı yaşadan – Mütləqsizlikdir.
8 Mərhəm günü, Çiçək Ayı, 15-ci il. Bakı.
İNAMSIZLIQ YÖNÜ
Dinə Qayıtmaq İnamsızlığı.
Kapitalizmə Qayıtmaq İnamsızlığı.
Qərbçiliyə Qapılmaq İnamsızlığı.
FƏRQ
Göy Dərinliyi var – İşıqlı.
Quyu Dərinliyi var – Qaranlıq.
9 Qismət günü, Çiçək Ayı, 15-ci il. Bakı.
FƏRQ
Həya – Qorxusuzluq.
Həyasızlıq – Qorxu əvəzi.
HƏQİQƏT
Adam – Var olmadığından Qorxur;
Yox olmaqdan Qorxur.
Adam – özünü Var olan saymır və Allahdan Qorxur;
Yox olmaq istəmir və Ölümdən Qorxur.
HƏQİQƏT
Adamda Cəsarət Qorxuyla qoşalaşır.
Həqiqətçilik Cəfəngiyyatçılıqla qoşalaşır.
Doğmalıq Yağılıqla qoşalaşır.
Heyrət Həsədlə qoşalaşır.
Ləyaqət Qəbahətlə qoşalaşır.
Bütöv Adam olmur əslində – Bütöv İnsan olur.
TƏKƏBBÜR
Sifəti çirkləndirən Ağalıq.
Sifəti çirkləndirən Xanımlıq.
HƏQİQƏT
Ağalıq – Adamda İnstinkt səviyyəsindədir.
Nökərlik – Adamda İnstinkt səviyyəsindədir.
Yırtıcılıq – Adamda İnstinkt səviyyəsindədir.
Cəfəngiyyatçılıq – Adamda İnstinkt səviyyəsindədir.
Qorxu – Adamda İnstinkt səviyyəsindədir.
Həsəd – Adamda İnstinkt səviyyəsindədir.
Şəhvət – Adamda İnstinkt səviyyəsindədir.
Özüylədöyüş – İnstinktlərlə döyüşdür – bu səbəbdən də əsil Ruhani Hünərdir.
12 Arzu günü, Çiçək Ayı, 15-ci il. Bakı.
YARANIŞ
Dünyadakılar Dünyadan yaranıb.
Dünya özündən yaranıb.
Dünyanın Mənası özündədir.
13 Ümid günü, Çiçək Ayı, 15-ci il.Bakı.
ÜMİDSİZLİK İNAMI
“Əlac Allaha qalıb” Sözündən Ümidsiz Söz yoxdur əslində.
HƏQİQƏT
İnsan Dünyanı Bilmədiyi dərəcədə Allaha inanır.
İnsan Dünyanı Bildiyi dərəcədə Mütləqə inanır.
17 Murad günü, Çiçək Ayı, 15-ci il.Bakı.
HƏQİQƏT
Allaha üz tutmaq – Özgəyə üz tutmaqdır.
Mütləqə üz tutmaq – Özünə üz tutmaqdır.
19 Arzu günü, Çiçək Ayı, 15-ci il.Bakı.
DİNİ POZĞUNLUQ
Cəfəngiyyatçılıq Pozğunluğu.
Qismətçilik Pozğunluğu.
İtaətçilik Pozğunluğu.
Cənnətçilik Pozğunluğu.
Cəhənnəmçilik Pozğunluğu.
20 Ümid günü, Çiçək Ayı, 15-ci il. Bakı.
DOĞMALIQ – YADLIQ
Doğma Vətən – Yad Cəmiyyət.
Doğma Həqiqət – Yad Siyasət.
Doğma Ruhaniyyat – Yad Hakimiyyət.
6 Mərhəm günü, İşıq Ayı, 15-ci il. Bakı.
“OLUM ya ÖLÜM” SUALI
Şekspirdə “Yaşamaq” və Ölmək” mahiyyətcə Birdir.
Həyat – Ölümdür, Ölüm – Həyatdır.
Əslində isə Var olmaq – Olumdan Artıqdır, Ölümdən Artıqdır.
11 Ümid günü, İşıq Ayı, 15-ci il. Bakı.
VƏZİYYƏT
Din adlanan Ümidsizlikdən İnam adlı Ümidə keçə bilmirlər Adamlar.
14 Qismət günü, İşıq Ayı, 15-ci il. Bakı.
HƏQİQƏT
Adam Həyatı yenəndə – İnsan yaranır.
Həyat İnsanı yenəndə – Adam yaranır.
17 Arzu günü, İşıq Ayı, 15-ci il. Bakı.
HƏQİQƏT
Aktyorluq – Oyunçuluq sənəti.
HƏQİQƏT
Siyasətdə – İnsanilik keçmir;
Ticarətdə – İnsanilik keçmir;
Siyasət – İnsanilikdən keçir;
Ticarət – İnsanilikdən keçir;
bu səbəbdən də Siyasətdə, Ticarətdə Ruhaniyyat məğlub olur.
28 Qismət günü, İşıq Ayı, 15-ci il. Bakı.
ƏLAQƏ
Dinçilik – Mənəvi Pulçuluq.
Pulçuluq – Maddi Dinçilik.
4 Qismət günü, Şölə Ayı, 15-ci il. Bakı.
