Ürəyinizdə Günəş olsun istəkli soydaşlarımız!
Asif Atanın Mütləqə İnam Ocağı toplumda davamlı olaraq milli, insani yöndən iş aparır. İstər yazılı, istər elektron basın (mətbuat) araçılığı ilə Asif Atanın Dünyagörüş sistemini yaymaqla yanaşı, Onun Ocağı birey (fərdi) və kütləvi görüşlər də həyata keçirir. Bu görüşlərdə gənclərimizin vətən sevgisini möhkəmlədən, milli dəyərlərə münasibətini aydınladan ideyaların öyrədilməsi başlıca yer tutur. Yurdumuzda yayılan, vətənsizləşdirən baxışların anlamı aydınlaşdırılıb rədd edilir. Son çağlar dəbdə olan “sınırların aradan qaldırılması” yalanları ilə aldadılan gənclərimizin sayı çoxalır. Bunun qarşısını, düşünürük ki, yüksək və orta oxullarda almaq gərəkdir. Milli dəyərlərimizin öyrədilməsi ilə gəncliyin üzünü vətənə çevirmək hər bir aydının, bilim adamlarının borcudur. İçəridən və dışarıdan mili kimliyimizi sarsıtmağa çalışan qüvvələri durdurmaq üçün gənclik onların etkisinə uğramamlıdır. Yabançı qüvvələrin, dağıdıcı təriqətlərin çağırışına aldanan gəncliyə umud bəsləmək olmur.
Bu deyilənləri anlatmaq, gəncliyi Asif Atanın milli-bəşəri Baxışına çağırmaq istəyiylə Mütləqə İnam Ocağının Yükümlüsü Soylu Atalı Bakıda Gimnaziya öyrənciləri və öyrətmənləri ilə görüş keçirmişdir. Görüşə 40-dan çox qatılan vardı. Uğurla başa çatan milli-ruhani söhbətimiz Asif Ata Ocağının Evladı İnamlı Atalının təşkilatçılığı ilə baş tutmuşdur.
Öyrətmənlər söhbətdən məmnun qalmış, yenidən bir araya gəlməyimizi və bu cür söhbətləri davam etməyimizi diləmişlər. Onlara çoxlu sayda Ocaq ədəbiyyatları da bağışlanmışdır.
Mütləqə İnam Ocağı
12 Köçəri Ayı, 36-cı il. Atakənd.
(fevral, 2015. Bakı.)
