Əsarət. Ətalət. Rəzalət. Ruhsuzluq. İnsansızlıq. Atasızlıq. Anasızlıq. Pünhansızlıq. Inamsızlıq. Yolsuzluq. Mütləqsizlik. Qismətsizlik.
Məhəbbət azlığı. Cəsarət azlığı. Səadət azlığı. Pərvanə azlığı.
Peyğəmbər yoxluğu. Cəngavər yoxluğu. Dirilər yoxluğu. Ölülər çoxluğu.
Duyğu qəbiristanlığı. Fikir qəbiristanlığı. Amal qəbiristanlığı. Vicdan qəbiristanlığı. Idrak qəbirstanlığı. İnam qəbiristanlığı.
Fikirdə əyrilik. Əməldə əyrilik. Gözlərin tərs görməsi. Qulaqların tərs eşitməsi. Ürəyin əyri vurması.
Köləliyə sevinmək. Əlilliyə sevinmək. Aldanışa alışmaq. Cəhalətə qovuşmaq.
Mehr itkisi. Sehr itkisi. Vəcd itkisi. Sirr itkisi.
Salam yalanı. Fərəh yalanı. Həmdəm yalanı. Həmdərd yalanı.
Nifrətin məhəbbəti üstələməsi. Qəbahətin ləyaqəti üstələməsi. Xəyanətin sədaqəti üstələməsi.
Fikirdə ülviyyət azlığı. Duyğuda qüdsiyyət azlığı.
Quduz təmtəraq. Cılız möhtəşəmlik. Alçağın ucalıq hipnozu! Əyyaşın aşiqlik hipnozu! Çirkinin gözəllik hipnozu!
Əsilsizlər çoxluğu! Nəsilsizlər çoxluğu! Döyüşkən canavar çoxluğu! Sürüşkən Amallar çoxluğu! Dişilər, erkəklər çoxluğu!
İzzətin itməsi! Qüdrətin itməsi! Bağlarda zəhərli meyvələr bitməsi! Vüqarın dağlardan dərəyə enməsi. Pələngin pişiyə dönməsi.
Beşiksiz körpələr. Fikirsiz idrak. Tutuquşu alimliyi. Biçimin məzmunu öldürməsi! İşrətin qeyrəti öldürməsi!
Min naqis içində bir xalis! Min naşı içində bir zəki! Min əyri içində bir doğru! Min saxta içində bir əsil! Min qəyyum içində bir qohum!
Zorla sevilmək. Zorla düşünmək. Zorla ağlamaq. Zorla böyütmək. Zorla yüksəltmək.
Məddah akrobatikası. Yaltaq akrobatikası. Rütbə akrobatikası. Mənsəb akrobatikası.
Əyilmiş bellər. Yalançı dillər. Qaldırılmışlar. Satılmışlar. Atılmışlar. Əhliləşmiş şücaət.
Əhliləşmiş ləyaqət.
Gədanın bəy ədası. Qarabaşın xanım ədası. Milçəyin fil təşəxxüsü. Böcəyin şir təşəxxüsü.
Cəllad mülayimliyi. Tülkü mərdanəliyi. Qəddar mərhəməti. Xəsis səxavəti. Xəbis məhəbbəti.
Qadında quş gözəlliyi. Kişidə quş ürəyi.
Sevilən əyyaşlar. Hərcayi alqışlar. Şəhvət meyi. Şöhrət meyi.
Ciddi yüngüllər. Pozğun təmizlər. Riyabənizlər.
Həya qıtlığı. Vəfa qıtlığı.
Ünsiyyət oyunu. Səadət oyunu.
Şikəst cavanlıq. Azad nadanlıq. Yarımqadınlıq. Yarımanalıq. Özünə bənzəməyən dünya. Özünə bənzəməyən xalq. Özünə bənzəməyən insan.
Təqlid çirkabı. Özünəyadlıq çirkabı.
Qabaqcıl cəhalət. Qabaqcıl qəbahət. Qabaqcıl cinayət. Çeşidli xəyanət.
Söz rəqqaslığı! Göz rəqqaslığı. Üz rəqqaslığı! Dil rəqqaslığı!
Fitnə yayanlar. Fəsada uyanlar. Pusquda duranlar.
Zavallı qarğışlar. Zərərli gülüşlər. Məkrli baxışlar.
Tərcümə arzular. Tərcümə qaydalar. Tərcümə adamlar. Tərcümə ailə. Tərcümə əlaqə.
Tənhalıq qisməti. Özünə həyanlıq qisməti. Özüylə pünhanlıq qisməti.
Axtarmaq – tapmamaq! Yüyürmək – çatmamaq!
Ləkəli gözəllik! Kölgəli ülvilik!
Ürəyin ürəkdən ikrahı! Gözlərin bəbəkdən ikrahı!
Saxta ümidlər! Bayağı bütlər!
Kədərlisən, İnsan! Çünki müdriksən!
