Mütləqə İnam Ocağının Yükümlüsü Soylu Atalının 8-ci – “Sözün Doğrusu” kitabı işıq üzü gördü. Kitabın ön sözünü oxuculara sunuruq:
Ön söz
Ürəyində Günəş olsun, sayğılı oxucu!
Dünyanın əyildiyi, insani münasibətlərin pozulduğu bir çağda hər kəs Allahdan ümid gözləyir. Ancaq bizim ümidimiz insanadır. Çünkü Allah insanda var olur. İnsanın Allahı var etməsi – mənəviyyata yüksəlməsidir. Başqa sözlə, Allah anlamı insanda mənəviyyat ölçüsüdür. İnsan bu ölçünü itirəndə heyvana enir, həyatı heyvani gedişlərlə doldurur. Ona görə hər şeyin qarışıq-dolaşıq düşdüyü bir çağda İnsanlığın Bayrağını başımız üzərinə qaldırıb onun harayını çəkirik. Çünkü ümid insanadır. Hər şey insanla bağlıdır: əyən də odur, düzəldən də; dağıdan da odur, quran da; yıxan da odur, qaldıran da…
Gərəksiz informasiya bolluğunda, kitabların oxunmadığı bir çağda biz kitab yazırıq. Çünkü çağdaş texnologiyaların gəlişməsindən doğan informasiya bolluğu İnsanlığın həqiqətlərini əvəz edə bilməz. İnsan texnologiyaların doğurduğu bilgilərlə zənginliyə yetər, üstünlüyə yetməz. Üstünlüyü İnsanlığın, ruhaniyyatın kitabları öyrədir. Bizim də bütün çabalarımız bu kitabları işləməyə, ortaya gətirməyə yönəlib. Biz İnsanlığa inandığımız üçün, İnsanlığın kitablarının oxunacağına, yararlanılacağına da inanırıq.
Sayğılı oxucu, oxu, bizə yardımçı ol. Ürəyin qüvvətli, gözlərin işıqlı olsun.
Yükümüzdən Böyük Fərəhimiz yoxdur!
Atamız Var olsun!
